Tak je negda zdavna nekakva baba v jesen posejala šenico. I dojde k letu f prolet i vidi da se šenica neje trefila i š ne nikaj neje bilo, nit bo. Pak jo je onak srdita mam zaklela: Nek ide k vragu i šenica, nek si jo vrag nosi!. Al je na te mekote bil veliki rast i sam je vrag sedel gore na vrju. Čul je kaj je baba rekla, i toga se je on držal, misleč da je sad šenica negova. Tak je došla i doba za žetvo pa se baba fputila na mekoto žet makar je šenica bila grintava. Prime se ona žeti, kad li se vrag oglasi z rasta: Baba, to je moja šenica! Em kaj bila tvoja, moja je – krikne baba. Od sega toga zišla je velika karka i saki je vlekel na svojo strano. Vragu je dodijalo pa ponodi babe da bo šenica nejina ako pogodi kuliko je star. Dobro – veli baba – i otije doma. Al se ona začas vrnola. Namazala si je rit z medom i polepila po njem perje. Čem je vrag ovo čudo i oduro videl, zajafče: Kak sem goder star sto i pet let, takvoga nekaj nigdar nesem videl! Tak je baba prefkanila i samoga vraga i dobila nazaj šenico. Lepo narod veli: Baba je gorša i od samoga vraga!.

Kazivačica Marija Zobunđija Marička (Severovci), zabilježio Miroslav Dolenec Dravski 1971. godine