Tak je bil jeden čovek i žena. Nijovi susedi imali so svate a neso je zvali v goste. To im je preveč bilo žal. A kak i ne bi kad na svate ima sega za pojesti i popiti. Fort so zmišlali kak bi došli med goščenike a da im ne bi zamerili kad neso pozvani. Da samo ovak dojdo, bez pozoviča, rekli bi im da so bez srama i poštejna. Onda veli čovek žene: Znaš kaj! Ti odbeži tam i jafči da te ja oču vmoriti, a ja dobežim za tebom, kakti da te iščem. Morti nas pogoste samo da se zmirimo. Kak so rekli, tak so i napravili.

Žena mam odbeži sa nafal rasplakana i pričme med goščeniki jafkati: Jaj mene jaj! Žene, ako Boga znate, skrijte me! Oče me ov moj tolvaj vmoriti! Na to ji vele žene: Odi sim sestrica, naj se bojati, em te mi skrijemo! Jako me skrijte sestrice da me ne najde! Ču ga ide! – fort je ponavlala. Povlečo jo k sebe: Odi brzo f kujno a mi ga vre zmirimo! Vu tom toga dobeži čovek i počme zijati: Gde je ta mrcina, nevola jo popala velika! Dok jo ščapim mam ji bo kraj! Nega so pak muškarci prijeli, zmirili i poseli za stol, makar se je otimal: Em se naj srditi za kajgoder! Dok se smiriš se bo vredu! A on vužgi još više: Ja nejem s iže vun dok jo ne najdem, onda ji z vratom zaofrkenem! Drugi mu je pak rekel: Sedni tu, tu so ti štrukli i flaša z vinom, pak ječ i pij, bo to dobro zišlo. On je to komaj dočakal al je sejeno i dalje zaklijnal na ženo i jeli i pil kaj mu ja vuvmi pucalo. I dok je pojel pol tigajne štruklov bilo ga je več sram dalje jesti. Onda se je tobože pak rasrdil: Da mi je tu f šakaj zagotil bi jok kak piščenko! – i mam je ono drugo polovico tigajne k sebe obrnol, pak je i dalje jel i pil dok neje celo tigajno pozmel. Žena je pak f kujne takaj stalno jela i nafal straja trpela. Tak so se čovek i žena lepo pogostili a nišče je ne na svate zval.