Evo kako je rijeku Dravu slikovito opisao Tomo Jalžabetić krajem 19. stoljeća:

Nuz Bakovce teče velika voda Drava. To ti je voda da je strahota gledeti jo, dok naraste. Dok dojdeš do nje, mam opaziš, da je na jednom kraju breg strmen a na drugom e mladj. Gdje strmec tu i voda brega trga, a to je žalibože, više na naš kraj nego na magjarski. Dok počme voda dohadjati onda se peni, nosi kladje, podjeda strmca i breg se odpukne, negde negde i po poldrug klafter na široko a na dogačko i prek deset klaftrov. Dok e več bolje podjedjen breg onda on odpukneni komad zemle opane vu vodo. Voda šprine a talasi se kuturajo. Dok se tak breg zruši, čuje se negda i pol vure daleko. Gde voda bolje pod breg vudara, tam onda dopelajo meline. A dok se onda pred melinom breg otrgne onda se melin niše i skače kak tikva na vode. Dok se stakvem trganjem, v nekojem mestu, v breg bolje zaje voda, onda se pod bregom voda vrti. Voda teče na matice (ili na kose) dole, a nuz breg teče gore do onoga vogla brega, otkod je zajedjen. Takvomu mestu gde se voda vrti, velimo vuliman. Vu takvom se vulimanu najviše love ribe jer je tu voda najmirneša. Mlinjari puščajo vodico pak čakajo dok se krap prime, onda ga veselo povleče, gore. Dok ga dobi do rok onda je vesel. Ajd strugat i meso kuvat, pak ako onda ima gde blizu vina eto onda gosti mlinjarom. Zato oni trpe straja dok puše jak veter i velik deždj ide, a najbolje dok ide vzime srež po Dravi. Srež velimo ledu, kojega voda nosi. Kad Drava jako naglo teče, onda se nemre led mam smrznoti kao na mirne vode, nego se najprede vlove skrajnice zjedne i druge strane. Onda dok privine luta zima onda se zapre i vpolovice.