Tak je bil jeden čovek foringaš i vozil je s koli koga je kam trebalo. Za novce. Dok je tak išel z jedne foringe doma nekakva mu je žena majala da stane da jo popela, al je on samo poteral konje i ostavil jo. Vu tom toga spazi da se za koli kutura jeden kotač, pak je stal. Obrne se i vidi da je kotač nekam zginol a na mesto nega do kol je došla stara šepava žena i prosila ga da jo popela. Dok je sela zapita jo dokleč da jo vozi, a ona veli:

Ajde, samo vozi, boš videl gde se ljudi plačo!

I tak so se vozili fajn dogo prek nekuliko sel pa jo foringaša pak zapita:

Onda, dokleč se bomo vozili?

A ona pove:

Ma boš čul gde se plačo i gde se sveti!

Več je prešlo pol noči kad mu veli žena naj stane jer se tu sveti:

Čuješ? – veli mu – tu se plačo jer je baš smrt došla tu čoveka zadusiti!

Foringaš se je bormeš fest prepal jer je svatil da to neje obična žena nego prava pravcata smrt.

Na to mu je ona rekla:

A znaš, za ono kaj me nesi štel mam popelati, ne boš mogel vmrti dogoder ja ne bom štela!

Onda je zišla s kol a on je ofliknol konje i bež čem dalje s toga mesta. Čuda je straja pretrpel jel ne znal gda bo smrt došla po njega. I sto i pet let je doživel, več ne mogel nikam i tak je onda komaj i komaj vmrl, celi život vu straju.